Jarðfest fornminni

Landsantikvarurin/Føroya Fornminnissavn hava ábyrgd av jarðføstum fornminnunum. Tey eru við lóg vard móti týning.

Tey friðaðu fornminnini skulu varðveitast, soleiðis at tey kunnu upplivast og granskast bæði í okkara tíð og um mong hundrað ár. Málið er, at so mong sum gjørligt fáa gleði av hesum fornminnum.

Tey fjaldu fornminnini liggja í jørðini ella í sjónum, og tey kunnu vit av góðum grundum ikki síggja. Fyri at vera vard, skulu tey tí verða kortløgd, eisini fyri at tað skal bera til at finna tey, tá ið tørvur verður á at kanna tey.

Tá ið nýggj fornminni koma undan kavi, t.d. í sambandi við arbeiði, skulu vit taka støðu til, um tað, ið funnið er, skal verða verandi í jørðini sum keldutilfar hjá framtíðar fornfrøðingum, sum uttan iva fara at hava nógv betri møguleikar og arbeiðshættir enn vit. 

Um tað ikki ber til at varðveita eitt fornminni í jørðini, skal tað, ið funnið er, útgravast, og lutir og skjalatilfar í sambandi við rannsóknina fáast í varðveitslu hjá Føroya Fornminnissavni.